สลฺลปิตํ เตนหิ รุกฺโข อเจตโนติ ตํปิ วจนํ มิจฺฉา ฯ อยํ อุภโต โกฏิโก ปญฺโห
ตวานุปฺปตฺโต โส ตยา นิพฺพาหิตพฺโพติ ฯ
ภาสิตมฺปิ เจตํ มหาราช ภควตา รุกฺโข อเจตโนติ ฯ ผนฺทเนน จ รุกฺเขน
ภารทฺวาเชน สทฺธึ สลฺลปิตํ ฯ ตญฺจ วจนํ โลกสมญฺญาย กถิตํ นตฺถิ มหาราช อเจตนสฺส
สลฺลาโป นาม อปิจ มหาราช ตสฺมึ รุกฺเข อธิวฏฺฐา เทวตา ตสฺสาเยว ตํ อธิวจนํ
รุกฺโขติ รุกฺโข สลฺลปตีติ เจสาว โลกปณฺณตฺติ ฯ ยถา มหาราช สกฏํ ธญฺญปริปูรํ
ธญฺญสกฏนฺติ ชโน โวหรติ ตญฺจ ปน สกฏํ กฏฺฐมยํ ตสฺมึ สกเฏ ธญฺญสฺส อากิริตตฺตา
ธญฺญสกฏํ นาม เอวเมตํ ชโน ชานาติ เอวเมว โข มหาราช น รุกฺโข สลฺลปติ รุกฺโข
อเจตโน ยา ปน ตสฺมึ รุกฺเข อธิวฏฺฐา เทวตา ตสฺสาเยว ตํ อธิวจนํ รุกฺโขติ รุกฺโข
สลฺลปตีติ เจสา โลกปณฺณตฺติ ฯ ยถา มหาราช ทธึ มณฺฐมาโน ตกฺกํ มณฺเฐมีติ โวหรติ
น ตํ ตกฺกํ ยํ โส มณฺเฐติ ทธึเยว โส มณฺเฐนฺโต ตกฺกํ มณฺฌฐมีติ โวหรติ เอวเมว
โข มหาราช น รุกฺโข สลฺลปติ รุกฺโข อเจตโน ยา ปน ตสฺมึ รุกฺเข อธิวฏฺฐา เทวตา
ตสฺสาเยว ตํ อธิวจนํ รุกฺโขติ รุกฺโข สลฺลปตีติ เจสา โลกปณฺณตฺติ ฯ ยถา มหาราช
ชโน อสนฺตํ สาเธนฺโต อสนฺตํ สาเธมีติ อสิทฺโธ สิทฺธิสลฺลาเปน วตฺตติ เอวญฺเจสา
โลกสมญฺญา เอวเมว โข มหาราช น รุกฺโข สลฺลปติ อเจตโน รุกฺโข ยา ตสฺมึ
รุกฺเข อธิวฏฺฐา เทวตา ตสฺสาเยว ตํ อธิวจนํ รุกฺโขติ รุกฺโข สลฺลปตีติ เจสา
โลกปณฺณตฺติ ฯ ยาย มหาราช โลกสมญฺญาย ชโน โวหรติ ตถาคโตปิ ตาย เตสํ
ธมฺมํ เทเสตีติ ฯ สาธุ ภนฺเต นาคเสน เอวเมตํ อตฺถํ ตถา สมฺปฏิจฺฉามีติ ฯ

รุกฺขานํ อเจตนปญฺโห ตติโย ฯ

ภนฺเต นาคเสน ภาสิตมฺปิ เจตํ ธมฺมสงฺคีติการเกหิ เถเรหิ
จุนฺทสฺส ภตฺตํ ภุญฺชิตฺวา กมฺมารสฺสาติ เม สุตํ
อาพาธํ สมฺผุสิตํ ธีโร สพาฬฺหํ มรณนฺติกนฺติ ฯ
ปุน จ ภควตา ภณิตํ เทฺวเม ปิณฺฑปาตา สมสมผลา สมสมวิปากา อติวิย อญฺเญหิ
ปิณฺฑปาเตหิ มหปฺผลตรา จ มหานิสํสตรา จ ฯ กตเม เทฺว ฯ ยญฺจ ปิณฺฑปาตํ
ปริภุญฺชิตฺวา ตถาคโต อนุตฺตรํ สมฺมาสมฺโพธึ อภิสํพุชฺฌติ ยญฺจ ปิณฺฑปาตํ ปริภุญฺชิตฺวา
ตถาคโต อนุปาทิเสสาย นิพฺพานธาตุยา ปรินิพฺพายติ อิเม เทฺว ปิณฺฑปาตา สมสมผลา